అగ్రరాజ్యం అమెరికాలో మీజిల్స్(Measles) వ్యాధి తీవ్ర స్థాయిలో విజృంభిస్తోంది. ఇటీవల పెన్సిల్వేనియా రాష్ట్రంలో ఏకంగా వెయ్యికి పైగా మీజిల్స్ కేసులు నమోదు కావడం స్థానికంగా ఆందోళన కలిగిస్తోంది. పెన్సిల్వేనియాలోనే కాకుండా అమెరికాలోని ఇతర రాష్ట్రాల్లో కూడా భారీగా కేసులు వెలుగుచూస్తున్నాయి. 1990ల తర్వాత అమెరికాలో మీజిల్స్ ఈ స్థాయిలో విజృంభించడం ఇదే మొదటిసారి కావడం గమనార్హం.
యూఎస్ సీడీసీ నివేదిక…
మీజిల్స్ వ్యాధి ఉధృతికి సంబంధించిన పూర్తి వివరాలను యూఎస్ సెంటర్ ఫర్ డిసీజ్ కంట్రోల్ అండ్ ప్రివెన్షన్(CDC) తాజాగా అధికారికంగా వెల్లడించింది. దీని ప్రకారం, ఈ ఏడాది ఇప్పటివరకు అమెరికా వ్యాప్తంగా ఏకంగా 3,869 మీజిల్స్ కేసులు నమోదయ్యాయి. 1990-91 కాలం తర్వాత ఈ స్థాయిలో అమెరికాలో ఈ ఏడాది మాత్రమే మీజిల్స్ వ్యాధి భారీగా ప్రభావం చూపుతోంది. ఈ ఏడాది ఏప్రిల్‌లో ఫిలడెల్ఫియాలో తొలిసారిగా మీజిల్స్ కేసులు వెలుగుచూశాయి. అక్కడే ఇప్పటివరకు దాదాపు 200 మందికి పైగా ఈ వ్యాధి బారిన పడ్డారు. ముఖ్యంగా ఈ వ్యాధి సోకిన వారిలో ఎక్కువ మంది ఎలాంటి వ్యాక్సిన్ తీసుకోని వారే ఉండటం గమనార్హం. ఇక ఒక్క పెన్సిల్వేనియా రాష్ట్రంలోనే ఇప్పటివరకు వెయ్యి మందికి పైగా ఈ ప్రాణాంతక వ్యాధికి గురయ్యారు.
డిజాస్టర్ ఎమర్జెన్సీ ప్రకటన..
పెన్సిల్వేనియాలో పరిస్థితులు తీవ్రంగా ఉండటంతో, పొరుగునే ఉన్న న్యూయార్క్ ప్రభుత్వం అప్రమత్తమైంది. ఇందులో భాగంగా ఈ నెల మొత్తం న్యూయార్క్ రాష్ట్రవ్యాప్తంగా డిజాస్టర్ ఎమర్జెన్సీని ప్రకటించారు. మీజిల్స్ వ్యాధి నివారణ చర్యలు, సకాలంలో గుర్తింపు, ప్రజలలో విస్తృతమైన అవగాహన కార్యక్రమాలను ప్రభుత్వం చేపడుతోంది. న్యూయార్క్ సిటీతో పాటు రాష్ట్రవ్యాప్తంగా ఇప్పటికే 100కి పైగా కేసులు నమోదయ్యాయి. ఈ వ్యాధి మరింత విస్తరించకుండా ఉండేందుకు ఆరోగ్య శాఖ అధికారులు భారీ ఎత్తున ప్రత్యేక వ్యాక్సినేషన్ కార్యక్రమాలను ముమ్మరం చేశారు. కేవలం న్యూయార్క్ మాత్రమే కాకుండా టెక్సాస్, సౌత్ కరోలినా వంటి ఇతర రాష్ట్రాలలో కూడా మీజిల్స్ కేసులు క్రమంగా నమోదవుతున్నాయి.
వ్యాధి లక్షణాలు…
మీజిల్స్ వ్యాధి సోకిన వ్యక్తులలో తీవ్రమైన జ్వరం, దగ్గు, ఒంటిపై దద్దుర్లు వంటి ఆరోగ్య సమస్యలు కనిపిస్తాయని వైద్య నిపుణులు తెలిపారు. ముఖ్యంగా చిన్నపిల్లలు ఈ వ్యాధికి త్వరగా ప్రభావితం అవుతారు. మీజిల్స్ బారిన పడకుండా ఉండాలంటే ప్రతి ఒక్కరూ సమయానికి తప్పనిసరిగా వ్యాక్సిన్ తీసుకోవాలని సీడీసీ అధికారులు గట్టిగా సూచిస్తున్నారు.
