సూపర్ స్టార్ రజనీకాంత్ హీరోగా, నెల్సన్ దిలీప్ కుమార్ దర్శకత్వంలో తెరకెక్కిన బ్లాక్‌బస్టర్ మూవీ ‘జైలర్’కు సీక్వెల్‌గా ‘జైలర్ 2’ ప్రేక్షకుల ముందుకు వచ్చింది. భారీ అంచనాల మధ్య విడుదలైన ఈ చిత్రం ప్రేక్షకులను ఏ మేరకు అలరించిందో సమీక్షలో చూద్దాం.
కథా నేపథ్యం:
కొడుకును కోల్పోయిన టైగర్ ముత్తువేల్ పాండ్యన్ అలియాస్ జైలర్ (రజనీకాంత్) తన కుటుంబంతో సాధారణ జీవితాన్ని గడుపుతుంటాడు. మరోవైపు వర్మను హత్య చేసిన వ్యక్తిని పట్టుకోవడానికి విగ్రహాల ముఠా సభ్యుడైన దిలీప్ (సూరజ్ వెంజరమూడు) ప్రయత్నిస్తుంటాడు. ఈ క్రమంలో దిలీప్‌ను బట్టబయలు చేసి, ఆ ముఠా వెనుక ఉన్న అసలు సూత్రధారిని కనిపెట్టాలని టైగర్ ముత్తువేల్ పాండ్యన్ భావిస్తాడు. లోకల్ రౌడీ మూర్తి (నమో నారాయణ) సహాయంతో దిలీప్ వరకు వెళతాడు. వీరిద్దరూ ఎదురుపడ్డాక ఏం జరిగింది? విగ్రహాల ముఠాను నడిపిస్తున్న బోధి కల్పక్ (ఎస్.జె.సూర్య) ఎవరు? ఈ కథలో కాంత (విద్యాబాలన్) పాత్ర ఏమిటి? నరసింహ (శివరాజ్‌కుమార్), మాథ్యూ (మోహన్‌లాల్), కామ్‌దేవ్ (జాకీ ష్రాఫ్)లతో పాటు రోడీ (హృతిక్ రోషన్) ఈసారి టైగర్‌కు ఎలా సహాయపడ్డారు అనేదే మిగతా కథ.
విశ్లేషణ:
రజనీకాంత్ ఇమేజ్‌ను, ఆయన వయసుకు తగ్గట్టుగా పర్ఫెక్ట్‌గా వాడుకుంటూ దర్శకుడు నెల్సన్ తొలి భాగాన్ని ఒక కల్ట్ కమర్షియల్ చిత్రంగా మలిచారు. ఆ సినిమా ఇచ్చిన భారీ విజయంతో సీక్వెల్‌పై అంచనాలు తారాస్థాయికి చేరాయి. ఆ అంచనాలను అందుకునేందుకు నెల్సన్ ఈసారి మాస్ ఎలివేషన్లు, కామెడీ, భావోద్వేగాలకు పెద్దపీట వేశారు.
సినిమా మొదటి భాగం ప్రేక్షకులను కడుపుబ్బా నవ్విస్తూ, పూర్తి ఎంటర్‌టైనెంగ్‌గా సాగుతుంది. మూర్తి పాత్ర ఎంట్రీ తర్వాత కథ వేగమందుకుంటుంది. రజనీకాంత్, యోగిబాబు, నమో నారాయణ కాంబినేషన్‌లో వచ్చే సన్నివేశాలు థియేటర్లలో నవ్వులు పూయిస్తాయి. దిలీప్ గ్యాంగ్‌ను భయపెట్టడం, ఇంటర్వెల్ సీన్స్, రజనీ ఎలివేషన్స్ సినిమాకు ప్రధాన బలంగా నిలిచాయి. తొలి అర్ధభాగం ముగిసేసరికి సినిమాపై అంచనాలు మరింత పెరుగుతాయి.
అయితే, ద్వితీయార్ధంలో కథనం కొంత నెమ్మదించింది. విలన్‌గా ఎస్.జె.సూర్య స్టైలిష్‌గా కనిపించినప్పటికీ, ఆ పాత్ర నుంచి ఆశించిన స్థాయిలో భయం లేదా తీవ్రత కనిపించలేదు. ముత్తువేల్ పాండ్యన్‌కు, కల్పక్ కుటుంబానికి మధ్య జరిగే మైండ్ గేమ్‌లు , డ్రామా పెద్దగా ఆకట్టుకోలేవు. కానీ, హృతిక్ రోషన్ అతిథి పాత్ర, క్లైమాక్స్ పోరాట ఘట్టాలు మాస్ ఆడియన్స్‌ను అలరిస్తాయి. తదుపరి భాగానికి అవసరమైన లీడ్‌తో సినిమా ముగుస్తుంది.
నటీనటుల ప్రతిభ:
టైగర్ పాత్రలో రజనీకాంత్ తన అద్భుతమైన అభినయంతో సినిమాను పూర్తి భుజాలపై మోశారు. ఆయన స్టైల్, చిన్న హావభావాలు అభిమానులను అలరిస్తాయి. అతిథి పాత్రలో కనిపించిన హృతిక్ రోషన్ తన రోడీ పాత్రతో ప్రత్యేక ఆకర్షణగా నిలిచారు. మోహన్‌లాల్, శివరాజ్‌కుమార్, జాకీ ష్రాఫ్ తమ గెస్ట్ రోల్స్‌తో మెరిశారు. సూరజ్ వెంజరమూడు, ఎస్.జె.సూర్య తమ పరిధి మేరకు నటించారు. విద్యాబాలన్, మిథున్ చక్రవర్తి పాత్రలు కథకు కీలకంగా మారాయి.
సాంకేతిక వర్గం:
సంగీత దర్శకుడు అనిరుధ్ అందించిన బ్యాక్‌గ్రౌండ్ స్కోర్ సినిమా స్థాయిని మరో మెట్టు ఎక్కించింది. పాటలు పర్వాలేనిపించినా, నేపధ్య సంగీతం మాత్రం అద్భుతంగా ఉంది. విజయ్ కార్తీక్ కణ్ణన్ సినిమాటోగ్రఫీ విజువల్స్ రిచ్‌గా ఉన్నాయి. నిర్మాణ విలువలు అత్యుత్తమంగా ఉన్నాయి. ద్వితీయార్ధంలో కొన్ని సాగదీత సన్నివేశాలు మినహాయిస్తే, దర్శకుడు నెల్సన్ మరోసారి బాక్సాఫీస్ వద్ద విజయం సాధించడమే కాకుండా ప్రేక్షకులకు సరికొత్త వినోదాన్ని అందించారు.
ప్లస్ పాయింట్స్:
రజనీకాంత్ నటన, స్టైల్
ప్రథమార్థం
కామెడీ, యాక్షన్ సీక్వెన్సులు
హృతిక్ రోషన్ అతిథి పాత్ర
మైనస్ పాయింట్స్:
ద్వితీయార్ధంలో కొన్ని స్లో సన్నివేశాలు
ఆశించిన స్థాయిలో లేని విలన్ పాత్ర తీవ్రత
