దౌత్య సవాళ్లు ఉన్నా తగ్గేదేలే.. అమెరికా-భారత్ వ్యాపార బంధం మరింత స్ట్రాంగ్!

అమెరికా-భారత్ దేశాల మధ్య ప్రభుత్వాల స్థాయిలో దౌత్యపరమైన ఒత్తిళ్లు, ఉద్రిక్తతలు ఉన్నప్పటికీ, వ్యాపారం, సాంకేతికత , వ్యూహాత్మక భాగస్వామ్యంలో సహకారం బలంగా కొనసాగుతోందని ఇరు దేశాల పరిశ్రమల ప్రముఖులు స్పష్టం చేశారు. సన్‌ఫ్రాన్సిస్కోలోని భారత కాన్సులేట్ జనరల్, ఆల్ ఇండియా మేనేజ్‌మెంట్ అసోసియేషన్ (AIMA), యుసి శాంటా క్రూజ్‌ల సంయుక్త ఆధ్వర్యంలో జరిగిన 9వ ‘యుఎస్-ఇండియా కాన్ఫరెన్స్’లో ఇరు దేశాల ఇన్వెస్టర్లు, పాలసీ మేకర్లు, ఐటీ, పరిశ్రమల అధిపతులు పాల్గొన్నారు.

దౌత్య సవాళ్లు ఉన్నా బలంగా..
హోదా పరంగా (State-to-State) ఇరు దేశాల మధ్య కొంత ఉద్రిక్త వాతావరణం ఉన్నప్పటికీ, ప్రజల మధ్య (People-to-People), వ్యాపారాల మధ్య (Business-to-Business) అనుబంధం ఎంతో బలంగా ఉందని సెలెస్టా క్యాపిటల్ మేనేజింగ్ పార్ట్‌నర్ అరుణ్ కుమార్ తెలిపారు. ఇటీవల టారిఫ్‌ల విధింపు, అంతర్జాతీయ వాణిజ్య విధానాల వల్ల సవాళ్లు ఎదురైనప్పటికీ, రెండు దేశాల ఆర్థిక ప్రయోజనాలు, సరఫరా వ్యవస్థలు ఒకదానిపై ఒకటి ఆధారపడి ఉన్నాయని ఏఐఎమ్‌ఏ (AIMA) సీనియర్ వైస్ ప్రెసిడెంట్ వినీత్ అగర్వాల్ పేర్కొన్నారు.

రూపాంతరం చెందిన ఐటీ రంగాలు..
ఒకప్పుడు కేవలం తక్కువ ఖర్చుతో కూడిన శ్రమ (Cheap Labor) కోసమే అమెరికా కంపెనీలు భారత్‌ వైపు చూసేవని, కానీ ఇప్పుడు ఆ పరిస్థితి పూర్తిగా మారిపోయిందని ఆటోమేషన్ ఎనీవేర్ సీఈఓ మిహిర్ శుక్లా వెల్లడించారు. ప్రస్తుతం రీసెర్చ్, ప్రొడక్ట్ డెవలప్‌మెంట్ వంటి కీలక సేవలను భారత్‌లోని గ్లోబల్ కేపబిలిటీ సెంటర్లు (GCCs) అందిస్తున్నాయని ఆయన పేర్కొన్నారు.

సాన్‌ఫ్రాన్సిస్కో కాన్సులేట్ ప్రతినిధి అభిషేక్ కుమార్ శర్మ మాట్లాడుతూ.. భారత్‌లోని జిసిసి (GCC)ల ద్వారా 23.6 లక్షల మందికి ఉపాధి లభిస్తోందని, ఇవి గతేడాది $98.4 బిలియన్ల రాబడిని సాధించాయని తెలిపారు. అలాగే రెండు దేశాల మధ్య వర్తక వాణిజ్యం $214 బిలియన్లకు చేరుకుందని వివరించారు.

మైక్రాన్ చిప్ ప్లాంట్ నుండి రిలయన్స్ పెట్టుబడుల వరకు..
మైక్రాన్ ఇండియా మేనేజింగ్ డైరెక్టర్ ఆనంద్ రామమూర్తి మాట్లాడుతూ.. గుజరాత్‌లో భారతదేశపు తొలి కమర్షియల్ చిప్ ప్లాంట్‌ను మూడేళ్ల కంటే తక్కువ వ్యవధిలోనే ఒప్పందం నుంచి ఉత్పత్తి స్థాయికి తీసుకెళ్లామని, దీనికి స్థానిక పర్యావరణ వ్యవస్థపై ఉన్న నమ్మకమే (Trust) ప్రధాన కారణమని పేర్కొన్నారు. మైక్రాన్ ప్రస్తుతం భారత్‌లో 8,000 మందికి పైగా సిబ్బందికి ఉపాధి కల్పిస్తోందన్నారు.

అదే సమయంలో భారతీయ కంపెనీలు కూడా అమెరికాలో భారీగా పెట్టుబడులు పెడుతున్నాయని గ్రాంట్ థార్న్టన్ భారత్ వైస్ ఛైర్ రిచర్డ్ రేఖీ తెలిపారు. రిలయన్స్ గ్రూప్ అమెరికాలో దాదాపు 40 ఏళ్ల తర్వాత నూతన ఆయిల్ రిఫైనరీని నిర్మిస్తోందని ఆయన గుర్తుచేశారు.

ఏఐ (AI) విప్లవం..
ఆర్టిఫిషియల్ ఇంటెలిజెన్స్ (AI) వేగంగా పురోగమిస్తున్న వేళ సాంకేతికతతో పాటు మానవ వనరులను సిద్ధం చేయడం అత్యంత కీలకమని హీరో ఎంటర్‌ప్రైజ్ ఛైర్మన్ సునీల్ కాంత్ ముంజాల్ అభిప్రాయపడ్డారు. ఏఐ వల్ల కొత్త ఉద్యోగాలు రాకముందే పాత ఉద్యోగాలు కోల్పోయే ప్రమాదం ఉందని, కాబట్టి ఉపాధి రంగాన్ని రీ-స్కిల్లింగ్ (Reskilling) చేయడంపై దృష్టి సారించాలని పిలుపునిచ్చారు.

పరిశ్రమలు, విద్యాసంస్థలు, ప్రభుత్వాలు కలిసి పనిచేస్తేనే ఏఐ ఆధారిత భవిష్యత్తు సవాళ్లను అధిగమించి గ్లోబల్ టాలెంట్ పూల్‌ను నిర్మించవచ్చని సదస్సులో పాల్గొన్న ఇతర నిపుణులు స్పష్టం చేశారు.